PAMBANSANG AWIT: LUPANG HINIRANG
Ang Lupang Hinirang ay unang ipinatugtog noong ika-12 ng Hunyo bilang pagpapahayag ng araw ng kalayaan sa Pilipinas. Pinagawa ni Aguinaldo si Julian Felipe, isang kompositor sa Cavite, na gumawa ng komposisyon na kanyang pinamagatang Marcha Filipina Magdalo.
PAMBANSANG BULAKLAK: SAMPAGUITA
Ang sampaguita ay sumisimbolo rin sa katapatan, debosyon, lakas at dedikasyon. Madalas itong ginagamit na palamuti sa buhok. Taon-taon ay ginaganap ang Sampaguita Festival sa bayan ng San Pedro, Laguna
PAMBANSANG PUNO: NARRA
Ang puno ng narra ay tinaguriang pambansang puno dahil sa tibay at tatag ng kahoy nito. Ang dahon, ugat, at balat naman ng troso ng narra ay maaari ring magamit na halamang gamot.
PAMBANSANG HIYAS: PHILIPPINE PEARL
Ang Philippine Pearl ay isang katangi-tanging parte ng kultura ng bansa. Ang Pilipinas ay isa sa mga nangungunang bansa na may produktong perlas sa buong mundo. Dito rin natuklasan ang pinakamalaking perlas na kinikilalang “Pearl of Allah” o “Pearl of Lao Tze”.
PAMBANSANG BANGKA: BALANGAY
Ang mga Pilipino noon ay nakatira malapit sa mga baybayin at ilog kaya naman ginagamit nila ang balangay upang mangisda, makipagkalakalan, at maglakbay. Unang nabanggit ang salitang “Balanghai” o “Balangay” noong 16th century sa Chronicles of Pigafetta. Kinikilala ang balangay bilang ang pinakamatandang Pre-Hispanic na sasakyang pantubig sa Pilipinas.
PAMBANSANG PALAKASAN (SPORT): ARNIS
Ang arnis ay tinaguriang National Sport at Martial Arts sa bansa. Ang larangang ito ay kilala sa pakikipaglaban gamit ang arnis (stick) o matalim na armas. Ito rin ay tinatawag na Kali o Eskrima.
PAMBANSANG IBON: PHILIPPINE EAGLE
Ang Philippine Eagle ay kilala rin bilang monkey-eating eagle. Isa ito sa pinakamalakas at hindi pangkaraniwang ibon sa buong mundo. Ang sinumang pumatay sa Philippine eagle ay maaaring makulong ng hanggang 12 taon.
MGA HINDI OPISYAL NA PAMBANSANG SAGISAG
Ang listahang ito ay mga iminungkahing pambansang sagisag ni Congressman Rene Relampagos as per House Bill 3926. Pinaniniwalaan ang karamihan dito na Pambansang Sagisag, ngunit hindi pa ito naisasakatuparan ng batas ng Pilipinas.
PAMBANSANG PAGKAIN: ADOBO
Ang adobo ay isa sa kadalasang ulam ng Pilipino. Ang pangunahing sangkap nito ay maaaring laman ng baboy o di kaya’y manok. Alamin ang isang masarap na paraan ng pagluto ng Adobo.
PAMBANSANG DAHON: ANAHAW
Ang anahaw ay kilalang gamit sa pag gawa ng sapin sa bahay, pamaypay, o pambalot ng pagkain. Kung minsan ay tinatawag din itong luyong.
PAMBANSANG SAPATOS: BAKYA
Ang sapin sa paa o sapatos na ito ay gawa sa magaan na kahoy mula sa santol o laniti. Kung minsan, ang takong nito ay makapal kaya naman ang iba ay umuukit ng iba’t ibang disenyo tulad ng bulaklak at mga halaman.
PAMBANSANG ISDA: BANGUS
Tinaguriang pambansang isda ang bangus dahil sa dami nito sa bansa. Mabuto ang mga bangus ngunit ito naman ay masustansya sa protina at Omega 3 at mababa sa taba. May mga ilan ring nagsasabi na mas masarap ang mga maliliit na bangus kumpara sa malalaki.
PAMBANSANG KASUOTAN (BABAE): BARO’T SAYA
Ang baro’t saya ay kadalasang gawa sa pinya ngunit may ilan ding gumagamit ng ibang materyales sa pag gawa nito. Ang mga kababaihan sa Pilipinas noong Spanish era ay nagsusuot ng palda na ang tawag ay saya at blusa na ang tawag ay baro.
PAMBANSANG KASUOTAN (LALAKI): BARONG TAGALOG
Ang barong tagalog ay pormal na kasuotan na gawa sa pinya at may mga disenyo na ibinurda. Madalas itong gamit sa pormal na pagdiriwang gaya ng kasal.
PAMBANSANG KANTA: BAYAN KO
Ang bayan ko ay isa sa mga kilalang makabayang kanta sa Pilipinas. Ang orihinal nito ay galing pa sa isang Espanyol at isinalin sa Tagalog ni José Corazón de Jesús. Narito ang liriko ng kantang Bayan Ko.
PAMBANSANG HAYOP: KALABAW
Ang kalabaw ay karaniwang nabubuhay ng 18 hanggang 20 taon. Maaari ring umabot hanggang 800 kilo ang kanilang mga timbang. Itim ang karaniwang kulay ng kanilang mga balat at parehong may sungay ang babae’t lalaking kalabaw.
PAMBANSANG SAYAW: CARIÑOSA
Ang Cariñosa ay nagmula sa mga Kastila kung saan mahiyain ang katangian ng babaeng sumasayaw. Sinasabi na kumakatawan ang pagiging mahiyain sa kaugalian noon ng mga kababaihan sa Pilipinas. Sa pagsayaw ng cariñosa, ang lalaki at babae ay sasayaw ng may pagkakahawig sa sayaw na waltz. Isang sayaw na panliligaw ang cariñosa at mapapansing mayroong hawak na pamaypay o panyo.
PAMBANSANG SASAKYAN: JEEPNEY/DYIP
Isang kilalang pampublikong trasportasyon sa bansa at isang malaking simbolo sa ating kultura nag mga jeep. Nagsimula ang paggawa ng mga jeepney dahil sa mga tira-tirang US military jeeps noong World War II. Binago ng mga Filipino ang disenyo nito upang mas madaming pasahero ang makasakay. Ang salitang jeepney ay pinaniniwalaang nagmula sa salitang “jeep” at “knee” dahil sa pagdidikit ng mga tuhod ng mga pasahero upang magkasya sa sasakyan.
PAMBANSANG PRUTAS: MANGGA
Mayroong iba’t ibang klase ng mangga sa bansa tulad ng Kalabaw, Pico, Indian, at Apple. Mahilig ang mga Pilipino kumain ng tinatawag na “manggang hilaw” na madalas na isinasawsaw sa asin at bagoong.
PAMBANSANG TIRAHAN: BAHAY-KUBO
Ang bahay-kubo ang mga tirahan ng mga katutubong o naunang Pilipino bago pa dumating ang mga Espanyol. Kadalasan ay gawa ito sa dahon ng niyog at mga kawayan. Ito ay idinisenyo para kayanin ang klima ng bansa.
IBA PANG PINANINIWALAANG PAMBANSANG SAGISAG
Ang mga nabanggit sa ibaba ay mga kadalasang kinikilala ring Pambansang Sagisag ng Pilipinas.
PAMBANSANG KATAUHAN/PANGALAN: JUAN DELA CRUZ
PAMBANSANG PAGKAIN: LECHON/SINIGANG
PAMBANSANG LARO: SIPA
PAMBANSANG SAYAW: TINIKLING
Ito ang mga pambansang sagisag ng Pilipinas. Kung may nais kang ipadagdag o baguhin ay maaari lamang mag komento sa ibaba.
